کورونا کے دوران ہمارا مقابلہ ایک ایسی سیاسی قیادت سے ہے جو کسی جمہوری جدوجہد سے نہیں گزری۔

 وزیراعظم عمران خان نے ایک مرتبہ پھر اپوزیشن پر تنقید کرتے ہوئے کہا ہے کہ کورونا کے دوران ہمارا مقابلہ ایک ایسی سیاسی قیادت سے ہے جو کسی جمہوری جدوجہد سے نہیں گزری۔

سماجی رابطوں کی ویب سائٹ ٹوئٹر پر اپنے پیغام میں وزیراعظم عمران خان نے لکھا کہ پاکستان میں کووڈ 19 کے دوران ہمارا مقابلہ ایک ایسی سیاسی قیادت سے ہے جو کبھی سیاسی جدوجہد سے نہیں گزری، نہ کبھی کسی عام شہری کو درپیش مشکلات کے لیے کام کیا اور نہ ہی عام شہریوں کی بہتری کے لیے کسی راہ میں کوئی اہم کردار ادا کیا۔

Problem confronting us in Pak during COVID 19 is of a political leadership that has never gone through any democratic struggle, nor worked with ordinary citizens to understand the problems they confront, nor contributed in any substantive way for betterment of ordinary citizens.

— Imran Khan (@ImranKhanPTI) November 29, 2020

 وزیراعظم نے لکھا کہ درحقیت ان ’رہنماؤں‘ کو نہ صرف عوام کے ساتھ کوئی ہمدردی ہے بلکہ ان کے خاندان نے قومی دولت کو لوٹ کر عوام کو مزید غریب کیا ہے۔

انہوں نے لکھا کہ یہ ’رہنما‘ اپنی ویران حویلیوں میں شاہانہ طرز کی زندگیاں گزار رہے ہیں او انہیں یہ پوزیشن صرف اپنے خاندانوں کی وجہ سے وراثت میں ملی ہے۔

اپنے پیغام میں عمران خان نے لکھا کہ اب ان کا واحد مقصد صرف اپنے خاندانوں کی لوٹی ہوئی دولت اور کرپشن کو بچانا ہے جس کا یہ بنیادی حصہ ہیں، یہ سب کچھ ان کی سیاست ہے اور انہیں عام شہریوں کی زندگیوں کی کوئی فکر نہیں ہے۔

ساتھ ہی وزیراعظم نے لکھا کہ این آر او حاصل کرنے کے لیے ان کی جاری تڑپ پر یہ کوئی بھی راستہ اپنا سکتے ہیں۔

So, when we did smart lockdown to save our poor from becoming destitute & save economy from total collapse, these "leaders" opposed & demanded complete lockdown. Now, with new spike, when we again need smart lockdown, they want jalsas not caring for the lives & safety of people

— Imran Khan (@ImranKhanPTI) November 29, 2020

 وزیراعظم نے ایک ٹوئٹ میں مزید کہا کہ لہٰذا جب ہم نے غریبوں کو محرومی اور معیشت کو تباہی سے بچانے کے لیے اسمارٹ لاک ڈاؤن کیا تو ان لیڈرز نے مخالفت کرتے ہوئے مکمل لاک ڈاؤن کا مطالبہ کیا اور اب جب اس نئی لہر کے دوران ہمیں دوبارہ اسمارٹ لاک ڈاؤن کی ضرورت ہے تو یہ لوگوں کی زندگیوں کی پرواہ کیے بغیر جلسے کرنا چاہتے ہیں۔

عمران خان کا کہنا تھا کہ یہ جلسے جلوس کر کے چاہتے ہیں کہ این آر او مل جائے جو کبھی بھی نہیں مل سکتا، جنہوں نے زندگی میں ایک دن بھی محنت نہیں کی، ان کا شاہانہ طرز زندگی ان کے اہلخانہ کی جانب سے لوٹی گئی عوام کی دولت پر منحصر ہے۔ 

آخر میں وزیراعظم نے لکھا کہ انہوں نے اپنی زندگی میں کبھی ایک دن کام نہیں کیا، ان کا ’شاہی‘ طرز زندگی کا براہ راست انحصار ان کے خاندانوں کی ناجائز، غیرقانونی طور پر حاصل کی گئی دولت پر ہے جو انہوں نے قوم کو لوٹ کر اور غریب کر کے بنائی۔