اے پی سی میں تقریر لائیو نشر نہ کرنے پر فضل الرحمان کا بلاول سے احتجاج

 جمعیت علماء اسلام (ف) کے سربراہ مولانا فضل الرحمٰن نے آل پارٹیز کانفرنس (اے پی سی) میں اپنی تقریر براہِ راست نشر نہ کرنے پر میزبان پاکستان پیپلز پارٹی (پی پی پی) سے احتجاج کیا ہے۔

اےپی سی میں مولانا فضل الرحمان کا تقریر نہ دکھانے پر بلاول بھٹو سے احتجاج#StateAboveState #نوازشریف #ووٹ_کو_عزت_دو pic.twitter.com/aDQQrZ44iw

— Shakir Ahmed Khan (@ShakirAhmed313) September 20, 2020

مولانا فضل الرحمان کا کہنا تھا کہ حکومت تو ہماری آواز پبلک میں جانے سے روکتی ہے لیکن اے پی سی نے بھی ہماری تقریر ائیر ہونے سے روکی، یہ نامناسب بات ہے، اس پر ہم پیپلز پارٹی اور منتظمین سے احتجاج ریکارڈ کرانا چاہتے ہیں۔

اسی پر چیئرمین پیپلز پارٹی بلاول بھٹو زرداری نے مولانا کو جواب دیا کہ آپ کے ایم این اے کی درخواست پر اس تقریر کو اِن کیمرا کیا ہے، اس کے بعد پریس کانفرنس ہوگی۔

پی پی چیئرمین کے موقف پر جے یو آئی (ف) کے سربراہ نے جواباً کہا کہ یہ اِن کیمرا تو نہیں تھا۔

ذرائع کا کہنا ہے کہ بلاول بھٹو نے وضاحت کے لیے مریم اورنگزیب اور شیری رحمان کو بلالیا، اے پی سی کا دوسرا سیشن ان کے ہمراہ ہے۔

بلاول بھٹو کا کہنا ہے کہ شرکا نے دوسرے سیشن کی تقریریں لائیو نہ دکھانے کی درخواست کی تھی۔

ذرائع کے مطابق بلاول بھٹو کی وضاحت پر مولانا فضل الرحمان مطمئن نہ ہوپائے، فضل الرحمان نے کہا کہ ہم نے تقریر براہ راست نہ دکھانے کی درخواست نہیں کی تھی۔

بعدازاں پشتونخوا ملی عوامی پارٹی  کے سربراہ محمود خان اچکزئی نے معاملہ رفع دفع کروایا۔